HATAW! D'yaryo ng Bayan hatawtabloid.com
HARD TALK!
ni Pilar Mateo
PAG-PACK -UP ng cast ng Lolong na kinuwarantin sa EDSA Shangri-la Plaza ng sampung araw, bago tumungo sa Villa Escudero, palit naman ang cast ng I Left My Heart in Sorsogon sa nasabing hotel.
Ibang klase ang pag-aalaga ng Kapuso sa kanilang mga artista. Service de luxe, ‘ika nga.
Sisimulan na ang taping ng pagbibidahang serye ni Ruru Madrid, ang Lolong. At mukhang nakapagsanay na sa mga routine nila ng buwayang si Dakila.
Masaya ang mga makakasama ni Ruru sa taping, mula sa aktor na si Christopher “Boyet” de Leon hanggang kina Abby Viduya, Jean Garcia, Maui Taylor, Leandro Baldemor at marami pa.
Sa I Left My Heart na kinabibilangan naman ng gaganap na tatay ni Heart Evangelista sa serye na si Rey “PJ” Abellana, ilang araw ding mananatili sa EDSA Shangri-la Hotel sina Richard Yap, Sharmaine Buencamino, Mavy Legaspi, Aubrey Miles, Isay Alvarez at marami pa.
Si Boyet (ng Lolong) eh may magandang kuwento, ayon sa manager na si Lolit Solis. Nagtanong daw ito kung pwede siyang magkaroon ng plus one. Sinagot ito ng taga-production na hindi naman niya kailangan ng taga-buhat ng mga gamit niya dahil hindi naman siya magpa-fashion show at mahirap ang role niya.
Natawa na lang si Lolit!
Si Mavy naman ng Sorsogon eh, halos hindi mapakawalan ng inang si Carmina Villaroel at iyak nang iyak dahil first time nga itong mawawalay ng matagal-tagal na panahon.
Siguradong marami pang kuwentong maibabahagi ang mga miyembro ng dalawa pa sa mga sinimulang mga proyekto ng Kapuso.
Mukhang marami pang aabangan.
With Pokwang in the network now, malamang na magsama sila ng Comedy Box Office Queen na si Ai Ai delas Alas in a project. At bakit naman hindi na rin isama si Eugene Domingo sa dalawa?
Siguradong riot ang kalalabasan. Eh, kung si Mr. M (Johnny Manahan) pa ang magdirehe halimbawa ng isang comedy show nila? Pwede!
Ang daming shows. Ang daming sumasakabilang-bakod. At parang may paglalagyan naman sa lahat.
Tingnan natin!
