INDIAN NATIONAL TIMBOG SA RIZAL (Sex video binantaang ikakalat)

INARESTO ng mga awtoridad ang isang Indian national nitong Linggo, 18 Hulyo, sa bayan ng San Mateo, lalawigan ng Rizal matapos pagbantaan ang dating kasintahan na ipo-post sa internet ang kanilang sex video kung tatangging makipagkitang muli sa kanya.

Iniulat ng Calabarzon police nitong Lunes, 19 Hulyo, nagtungo sa kanilang himpilan ang biktima dakong 10:30 pm kamakawa at nagsampa ng reklamo laban sa suspek na kinilalang si Gurmet Singh, alyas Tony Kasel.

Ayon sa biktima, matapos nilang maghiwalay ay nagsimula na siyang pagbantaan ni Singh na kung tatanggi siyang makipagtalik sa suspek ay ia-upload ang kanilang mga sex video sa social media.

Bukod dito, nagbanta rin si Singh na papatayin ang mga anak ng biktima kung hindi niya susundin ang suspek.

 

Dinakip ng pulisya si Singh sa ikinasang entrapment operation sa loob ng isang fast food joint sa lungsod ng Antipolo matapos pumayag makipagkita sa kaniya ng biktima.

 

Kinompiska rin ng mga awtoridad ang cellphone ni Singh upang isailalim sa digital forensic examination.

 

Kasalukuyang nakapiit ang suspek habang inihahanda ang mga kasong kriminal na isasampa laban sa kanya. ###