Coco nanira ng sariling record (Online viewers ng FPJAP lalong dumami)

SHOWBIZ KONEK
ni Maricris Valdez Nicasio

“DAHIL po sa inyo, lalo po kaming ginaganahan magtrabaho kahit napakahirap ng sitwasyon ngayon because of COVID-19.” Ito ang tinuran ni Coco Martin sa patuloy na pagdami ng mga sumusubaybay gabi-gabi sa kanyang action-seryeng FPJ’s Ang Probinsyano sa YouTube sa Kapamilya Online Live ng ABS-CBN.

Walong magkakasunod na episodes ang sinira ng programa na ang sarili nitong record na pinakamaraming viewers ang sabay-sabay na nanonoood sa Kapamilya Online Live sa YouTube.

Kaya naman ganoon na lamang ang kasiyahan ng actor.

Aniya sa panayam ng TV Patrol, ”Dahil po sa inyo, lalo po kaming ginaganahan magtrabaho kahit napakahirap ng sitwasyon ngayon because of COVID-19. Kapag naririnig namin na nandyan pa rin kayo para samahan kami gabi-gabi,  patuloy na nagpapalakas ng loob namin, kahit ano ang lungkot, hirap na pinagdaraanan namin ngayon. Kayo po ang nagbibigay ng lakas sa amin.”

Noong Hunyo 3, nagtala ng 154,039 na live concurrent viewers ang action-serye na tumutok sa madugong pakikipaglaban nina Cardo Dalisa (Coco), Lia (Jane De Leon), at Task Force Agila sa batalyon ni Renato (John Arcilla) na nauwi sa pagkakasawi nina Teddy (Joel Torre) at Virgie (Shamaine Buencamino).

Marami sa mga kasama ni Cardo ang sugatan ngunit matagumpay naman silang nakatakas mula kay Renato.

Kaya kung gusto ninyo ng umaatikabong bakbakan, ‘wag palampasin ang mga maaaksiyong eksena sa FPJ’s Ang Probinsyano gabi-gabi sa Kapamilya Channel, A2Z, TV5, CineMo, Kapamilya Online Live sa YouTube channel at Facebook page ng ABS-CBN Entertainment, iWantTFC, WeTV, at iflix.