Friday , June 25 2021
Breaking News
You are here: Home / News / 75 eskursiyonista tinekitan ng PNP sa Norzagaray (Libo-libo dumagsa sa ilog)
75 eskursiyonista tinekitan ng PNP sa Norzagaray (Libo-libo dumagsa sa ilog)

75 eskursiyonista tinekitan ng PNP sa Norzagaray (Libo-libo dumagsa sa ilog)

MASUSING iniimbestigahan ng pulisya upang matukoy kung mayroong pananagutan ang mga lokal na opisyal sa pagdagsa ng libo-libong eskursiyonista sa mga ilog sa bayan ng Norzagaray, lalawigan ng Bulacan noong Linggo, 23 Mayo.
 
Ito ay matapos mabatid na ilang barangay officials ‘umano’ ang naningil ng ‘entrance fee’ sa mga dumagsang eskursiyonista.
 
Napag-alamang sa kabila ng patuloy na pagpapatupad ng mas pinahigpit na general community quarantine (GCQ) ay tinatayang dalawa hanggang tatlong libong katao ang dumagsa sa Bakas River at Kanyakan River, sa Brgy. Matictic, sa nabanggit na bayan kamakalawa.
 
Ayon kay P/Col. Lawrence Cajipe, provincial director ng Bulacan PPO, nang matanggap ang ulat ay agad umaksiyon ang mga tauhan ng Norzagaray Municipal Police Station (MPS) at Bulacan 2nd Provincial Mobile Force Company at dito nila inabutan ang maraming eskursiyonistang lumabag sa ipinatutupad na Minimum Public Safety Health Standard protocol ng IATF.
 
Nabatid, maging si Norzagaray Mayor Fred Germar ay nasa lugar ng mga oras na iyon at pilit nakikiusap sa mga taong dumagsa na magsiuwi sa kani-kanilang tahanan at sundin ang ipinapairal na guidelines ng IATF.
 
Ayon sa ulat, nabigyan ang 75 eskursiyonista ng Provincial Citation Tickets, samantala ang iba, sa pangambang makasuhan ay dali-daling sinunod ang tagubilin at nagsilisan.
 
Kasama sa iimbestigahan ng pulisya ang sinasabing paniningil ng entrance fee ng mga barangay official sa mga taong nagpunta sa ilog.
 
Dagdag ni Cajipe, ang Bulacan PNP ay patuloy sa pagbibigay ng mga babala sa mga mahuhuling lumalabag sa health and safety protocols sa lalawigan at sisiguraduhin ang maigting na pagpapatupad upang matiyak na nasusunod ang mga kautusan ukol sa ordinansa, proklamasyon, memoranda at executive order sa kasalukuyang community quarantine. (MICKA BAUTISTA)

About Micka Bautista

Leave a Reply

Your email address will not be published. Required fields are marked *

*

Scroll To Top