HATAW! D'yaryo ng Bayan hatawtabloid.com
HINDI napigilan ni Foreign Affairs Secretary Teddy Locsin, Jr., na maglabas ng maanghang na salita laban sa bansang China.
Kasunod ito ng naging apela ng China sa Filipinas na tigilan ang anomang aktibidad sa West Philippine Sea na makapagdudulot ng tensiyon.
Sa tweet ni Locsin, ang China ang may problema dahil hindi marunong makinig maging sa kanyang sarili kaya’t hindi mapagsabihan na mali ang kanyang ginagawa at huwag gawin ng iba.
Hindi umano mahirap intindihin ang pahayag ng Pangulong Rodrigo Duterte hinggil sa United Nations (UN) Declaration at sa Arbitral ruling na nagpapatunay na lahat ng maritime features doon ay pag-aari ng Filipinas.
Nanindigan ang Kalihim na hindi ang Filipinas ang sumira sa relasyon at pagkakaibigan ng China bagkus sila ang sumira at dapat silang lumayas.
Nasabi ito ng Kalihim sa maanghang na pananalita na may halong mura (oh get the fuck out).
Sa pagpuna sa naging pahayag ng Kalihim laban sa China, sinabi nito, nais niyang iparamdam ang kanyang sinseridad sa kanyang sinabi.
Sa karaniwan aniyang pananalita ng diplomatiko, walang nangyayari, pero hindi rin naniniwala ang Kalihim na may positibong epekto ang kanyang pamamaraan ng pagpapahayag laban sa China.
Aniya, pahayag niya ito sa kanyang mga pagtitimpi laban sa China na mas malala naman kompara sa kahihiyang dinanas ngayon ng China sa rehiyon at sa mundo. (JAJA GARCIA)
