67-anyos biyudong lolo, walong taon ginahasa sariling apo, arestado

DINAKIP ang isang biyudong senior citizen na malaon nang pinagha­hanap ng batas dahil sa kinahaharap na kasong panggagahasa sa lungsod ng San Jose del Monte, lalawigan Bulacan, nitong Martes, 20 Abril.

Sa ulat kay P/Col. Lawrence Cajipe, provincial director ng Bulacan PPO, nadakip ng mga tauhan ng San Jose del Monte City Police Station (CPS), 4th MP, 2nd PMFC-Bulacan PPO, 301st RMFB-3, at 24th Special Action Company (SAF) ang suspek na kinilalang si Sixto Francisco, 67 anyos, biyudo, at kasalukuyang naninirahan sa No. 116 Sitio Lambakin, Brgy. Sto. Cristo, sa nabanggit na lungsod.

Inaresto ang akusa­dong lolo sa bisa ng warrant of arrest para sa dalawang bilang ng kasong rape na nilagdaan ni Judge Ma. Cristina Juanson ng San Jose del Monte RTC Branch 5-FC.

Inakusahan si Francisco ng paulit-ulit na pangmomolestiya at panggagahasa sa kanyang sariling apo mula taon 2011 hanggang 2019 ngunit matapos sampahan ng kaso ay nagpakatago-tago sa batas.

Ayon kay Cajipe, ang pagkakaaresto sa akusado ay magbibigay ng kapa­natagan sa pamilya ng biktima at tiniyak niyang makatutulog ang pamilya ng biktima nang mapa­yapa.

(MICKA BAUTISTA)