Tuesday , July 27 2021
Breaking News
You are here: Home / News / ‘Lockdown’ sa bayan bakasyon kay Roque binatikos ng netizens
‘Lockdown’ sa bayan bakasyon kay Roque binatikos ng netizens

‘Lockdown’ sa bayan bakasyon kay Roque binatikos ng netizens

INULAN ng batikos ang pahayag ni Presidential Spokesman Harry Roque na isang taon nang ‘nakabakasyon’ ng mga Pinoy mula nang isailalim sa quarantine ang bansa bunsod ng CoVid-19 pandemic kaya marapat ang pagbawi sa tatlong special working holidays ni Pangulong Rodrigo Duterte.

“Well, alam po ninyo, iyan ay dahil po sa advice ng economic team. Napakatagal na po natin nakabakasyon. Halos isang taon na tayong nagbakasyon dahil sa CoVid-19,” reaksiyon ni Roque sa panawagan ng ilang senador sa Malacañang na ikonsidera at bawiin ang anunsiyong special working holidays ang November 2, December 24 at December 31.

“Siguro naman po ngayong nandito na ang bakuna, hayaan naman nating maka-recover tayo for lost time ‘no,” dagdag niya.

Para kay Bagong Alyansang Makabayan (Bayan) secretary-general Renato Reyes, Jr., hindi matatawag na bakasyon ang nakalipas na isang taong kalbaryong naranasan ng mga mamamayan sa ilalim ng pandemya.

“Malayo sa bakasyon ang nangyari noong nakaraang taon. Ibayong dusa ang sinapit ng tao. Milyon-milyon ang nawalan ng trabaho. Parang kasalanan na naman ng tao itong problema,” sabi ni Reyes sa Facebook account.

Ayon kay human rights lawyer Maria Sol Taule, hindi matatawag na nagbakasyon sa nakaraang isang taon ang mga driver na ilang buwan nang hindi nakapapasada, mga obrerong nawalan ng trabaho, mga nag-online selling at mga taong 24/7 work from home pero walang overtime pay.

“Malamang nagbakasyon kasi nawalan ng trabaho,” patutsada ni dating Kabataan partylist Rep. Terry Ridon kay Roque.

(ROSE NOVENARIO)

About Rose Novenario

Leave a Reply

Your email address will not be published. Required fields are marked *

*

Scroll To Top