Kelot pumalag sa checkpoint patay sa shootout (Sa SJDM City)

BINAWIAN ng buhay ang isang hindi kilalang lalaki matapos manlaban at makipagbarilan sa pulisya na nagmamando ng checkpoint sa lungsod ng San Jose del Monte, sa lalawigan ng Bulacan, nitong Lunes ng madaling araw, 8 Pebrero.

Sa ulat mula kay P/Lt. Col. Fitz Macariola, Force Commander ng Regional Mobile Force Battalion 3, dakong 4:00 am kamakalawa, habang ang mga elemento ng 301st MC ay nagsasagawa ng checkpoint operation sa Brgy. Kaypian, pinahinto ang isang hindi kilalang lalaking sakay ng Honda Beat motorcycle na nakasuot ng dilaw na sombrero at facemask ngunit walang helmet.

Imbes magpabagal ng takbo at huminto, bumunot ang lalaki ng kalibre .38 revolver saka pinaputukan ang mga tauhan ng RMFB3 na nagsasagawa ng checkpoint.

Dito mabilis na kumilos ang mga miyembro ng checkpoint team at gumanti ng putok hanggang masapol ng bala ang lalaki at mapatay sa barilan.

Kasalukuyang nag­sasagawa ng imbesti­gasyon ang pulisya upang matukoy ang pagkakakilanlan ng napatay na suspek.

(MICKA BAUTISTA)