Friday , September 25 2020
Breaking News
You are here: Home / Hataw Lifestyle / Libreng “telemedicine” inilunsad sa Maynila (Non-contact consultation sa GABMMC)
Libreng “telemedicine” inilunsad sa Maynila (Non-contact consultation sa GABMMC)

Libreng “telemedicine” inilunsad sa Maynila (Non-contact consultation sa GABMMC)

KAPAKINABANGAN para sa mga mamamayan ang prayoridad ni Mayor Francisco “Isko Moreno” Domagoso kaya isang panibagong paraan kontra CoVid-19 ang inilunsad sa Gat Andres Bonifacio Memorial Medical Center (GABMMC), Lungsod ng Maynila.

Ayon kay Moreno, ang mga pasyenteng magpapakonsulta ay hindi na kinakailangan magtungo sa ospital, kinakailangan lamang matutunang gumamit ng bagong pamamaraan na “telemedicine.”

Ang “telemedicine” ay inisyatiba ng lokal na pamahalaan upang manatili sa tahanan ang mga pasyenteng nais magpakonsulta sa espesiyalista para mabawasan ang tsansa na magkaroon o mahawa ng  coronavirus.

Kaugnay nito, hinihikayat ni Moreno ang publiko, partikular ang mga residente ng Maynila na aralin ang telemedicine para sa kapakinabangan at inisyatiba ng   GABMMC na pinamumunuan ng director na si Dr. Ted Martin.

Ang non-contact consultation o telemedicine ay bukas mula 8:00 am hanggang 5:00 ng pm mula Lunes hanggang Biyernes.

Ayon kay Martin, ang telemedicine ay sa pamamagitan ng telephones, cellphones, computers, o electronic gadgets upang maiwasan ang tradisyonal na harapang  consultation, diagnosis, treatment, management, education, at follow-up care.

Idinagdag ni Martin na sa telemedicine ay gagamit din ng two-way audio at video, larawan ng pasyente, medical images, medical records, at iba pang mahalagang bagay na kailangan tulad sa normal na konsultasyon.

Tiniyak ni Martin, sa telemedicine ay mapangangalagaan rin ang pagkakakilanlan ng mga pasyente, privacy, confidentiality, at corruption of records dahil gagamit sila ng electronic system para sa security protocols sa network at software nito.

Sa pamamagitan ng telemedicine, ang pasyente ay magkakaroon ng medical evaluation, impression, at mas maiintindihan niya nang husto ang kanyang kalagayan at magagabayan din siya kung paano harapin ito at kung anong hakbang ang susunod na gagawin, kabilang ang prescription at gabay sa kung anong posibleng laboratory o imaging test ang kakailanganin.

Ang lahat ng pasyenteng interesado ay maaaring i-follow ang GABMMC sa kanilang official Facebook page: http://facebook.com/gabmmcofficial para sa  importanteng detalye at impormasyon tungkol sa telemedicine at kung ano ang hakbang na dapat gawin para sa libreng konsultasyon. (BRIAN BILASANO)

About Brian Bilasano

Leave a Reply

Your email address will not be published. Required fields are marked *

*

Scroll To Top