HATAW! D'yaryo ng Bayan hatawtabloid.com
NAKUHA sa dalawang babae at kasamang lalaki ang halos P400,000 halaga ng hinihinalang shabu sa buy bust operation ng awtoridad sa Parañaque City, kamakalawa.
Kinilala ni Parañaque City Police chief, Col. Robin King Sarmiento ang mga suspek na sina Menandro Richardson, 40 anyos, binata; Jaren Guenthoer, 23 anyos, dalaga; at Ryza Gesate, 33, dalaga; pawang residente sa Silverio Compound, Purok 4, Barangay San Isidro sa nasabing lungsod.
Ayon sa ulat, nagkasa ng buy bust operation dakong 11:30 pm ang mga operatiba ng Station Drug Enforcement Unit (SDEU) sa pangunguna ni P/Maj. Anthony Alising, na ikinaaresto ng mga suspek sa Silverio Compound, Purok 5, Barangay San Isidro sa Parañaque City.
Nasamsam sa tatlo ang limang pakete ng 58 gramo ng shabu na nagkakahalaga ng P394,400 at P300 buy bust money na kanilang ikinadakip.
Dinala ang mga ebidensiya sa SPD Crime Laboratory upang suriin.
Nakakulong ang tatlo sa custodial facility ng pulisya at mahaharap sa kasong Comprehensive Dangerous Drugs Act of 2002 sa Parañaque Prosecutor’s Office. (JAJA GARCIA)
