Sunday , November 1 2020
Breaking News
You are here: Home / News / Flight Manila-Xiamen-Manila… 124 pasahero ng PAL Special Flight maayos na nakabalik sa bansa
Flight Manila-Xiamen-Manila… 124 pasahero ng PAL Special Flight maayos na nakabalik sa bansa

Flight Manila-Xiamen-Manila… 124 pasahero ng PAL Special Flight maayos na nakabalik sa bansa

LUMAPAG sa Ninoy Aquino International Airport (NAIA) terminal 2 ang Philippine Airlines (PAL) special flight mula Manila-Xiamen-Manila, Airbus 321 na may 199 seating capacity dakong 1:16 pm nitong Lunes, 10 Pebrero na may lulang 124 pasahero kabilang ang 51 Chinese national na may hawak na permanent visa.

Ayon kay Cielo Villaluna, tagapagsalita ng PAL, lulan ng special flight PR 335 mula Xiamen, China ang anim na cabin crew at dala­wang piloto na may dalang 73 stranded na overseas Filipino workers sa Xiamen at 51 Chinese national na may permanent visa kasama ang limang bata.

Dagdag ni Villaluna, may sakay ang special flight mula Maynila patungong Xiamen nang umalis sila sa NAIA.

Nabinbin ang may 124 pasaherong kinabi­bilangan ng 73 OFWs sa Xiamen dahil naabutan ng travel ban na inilabas ng Malacañang bilang tugon sa pagkalat ng  2019 novel coronavirus – acute respiratory disease (nC0V ARD).

Nang lumapag sa NAIA, agad tumungo ang Airbus 321 sa remote parking kung saan nag­hihintay ang apat na PAL co-bus na nagdala sa kanila sa bus gate ng terminal 2 at sumailalim sa quarantine at im­migration procedures.

Gumamit ang mga quarantine doctor at nurses ng ilang portable thermal scanners upang matiyak na walang nila­lagnat sa mga pasahero bago sila pinayagang makaalis ng terminal.

Umalis ang special flight sa NAIA dakong 7:37 am noong Lunes, 10 Pebrero, at dumating sa Xiamen dakong 9:45 am saka umalis sa Xiamen dakong 11:05 am at lumapag sa NAIA dakong 1:16 pm.

Ayon kay Villaluna, ang special flight ay bahagi ng serbisyo publiko ng PAL para sa mga banyaga at lokal na mga pasahero.

Samantala, inianun­siyo ni Bureau of Immigra­tion (BI) Commissioner Jaime Morente na sumasa­ilalim sa home quarantine bilang “preventive measure” laban sa pagkalat ng nC0V ARD ang 19 immigration officers na sumakay sa mga eropla­nong may lulang mga pasaherong may travel history mula China at Special Administrative Regions.

Sa kanilang paha­yag sa media, sinabi ni Morente na sumakay ang 19 IOs sa limang mag­kakaibang cruise ships na may sakay na mga pasaherong bumi­si­ta sa China, Hong Kong, at Macau sa huling 14 araw, at du­mating mula Enero hanggang Pebrero.

Pahayag ni Moren­te, ”The 19 immigration officers did not exhibit any symptoms of the virus, and neither did the passengers that they inspected.  They were assessed by competent personnel of the Bureau of Quarantine, who were part of the boarding teams that inspect arriving ships. We are doing this as a preventive measure, to ensure that our officers are pro­tected from the virus.”

Inilinaw at idiniin ni Morente sa mga tauhan ng BI na walang dapat ipangamba dahil gina­wa nila ang lahat para maseguro ang kaligta­san ng lahat.

                         (JSY)

About JSY

Leave a Reply

Your email address will not be published. Required fields are marked *

*

Scroll To Top