Sekyu nagbuwis ng buhay laban sa holdap sa Starmall (Sa San Jose del Monte City)

IBINUWIS ng isang guwar­diya ang sariling buhay sa pagtupad ng kanyang tung­kulin matapos harangin at labanan ang holdaper sa Starmall, San Jose Del Monte City, sa lalawigan ng Bula­can, nitong Martes ng gabi, 22 Oktubre.

Sa ulat mula sa San Jose del Monte (SJDM) City Police Station (CPS), kinilala ang napaslang na biktimang si Ronnie Pascua, residente sa Bgy. Bagong Buhay, sa nabanggit na lungsod.

Ayon kay P/Lt. Col. Orlando Castil, hepe ng SJDM City police, hinoldap ang isang bayad center sa nasabing mall at sinubukang harangan ni Pascua ang papa­takas na holdaper hang­gang nauwi sa pagpa­pambuno ng dalawa.

Nang makakuha ng ti­yempo ay malapitang binaril ng holdaper ang guwardiya saka nagmamadaling luma­bas upang tumakas.

Kasalukuyang tinutugis ng pulisya ang nakatakas na suspek samantala inaalam ang halagang nakulimbat sa niloobang bayad center.

Ang Starmall ay pag-aari ng pamilya nina Senator Cynthia Villar at sister company ng kasalukuyang water concessionaire na Prime Water sa nasabing lungsod.

(MICKA BAUTISTA)