HATAW! D'yaryo ng Bayan hatawtabloid.com
TAO lang po.
Ito ang madalas na ikinakatuwiran kapag pumapalpak o sumasalto kahit sa simpleng trabaho.
O kaya naman sasabihin, puwede namang magkamali basta importante marunong humingi ng sorry.
Madalas mangyari ito sa mga ahensiya ng gobyerno na dapat sana ay metikuloso sa editing and proofreading.
Kapag sumasalto, nag-i-erratum.
E paano kung sa diplomatic community nangyayari ang mga ganitong klase ng salto, lalo na kung insignia ang tinutukoy?
At ang insignia na tinutukoy natin, logo ng Taiwan’s (Republic of China) Ministry of Defense imbes insignia ng People’s Republic of China (Mainland China).
Wow mali?!
Malaki po ang pagkakaiba ng Republic of China at People’s Republic of China. ‘Yung una ay sa Taiwan, dating lalawigan ng Formosa na pinagtayuan ni Chiang Kai Sek ng kanyang gobyernong Kuomintang bilang pagtutol sa ideolohiyang komunista.
Habang ang People’s Republic of China (PROC) ay republikang itinatag ng Chinese Communist Party na pinamumunuan ni Mao Zedong (o Mao Tse Tung) na dumaan muna sa mahabang panahon ng pakikibaka mula sa cultural revolution at pagwasak sa sistemang piyudal na itinatag at nais panatilihin ng iba’t ibang mapang-aliping dinastiya hanggang sa pakikidigma sa mga dayuhang puwersa na nais sumakop sa kanilang bansa.
Kumbaga, ang insignia ng People’s Republic of China ay hindi lamang iginuhit ng tinta sa papel. Ang insignia ng PROC ay nilikha at iminarka ng mahabang kasaysayan ng kanilang pakikibaka para lumaya sa lahat ng uri ng supresyon at opresyon laban sa kanilang lahi.
Kaya kung magiging mahigpit sa diplomatic relations ang PROC, isang malaking insulto sa kanila na matapos nilang mag-donate ng 3,000 assault rifle sa bansa, ang makikita nilang pinasasalamatan ng Department of Defense ng Filipinas ay Taiwan at hindi ang China.
Sa ulat ng Rappler, sinabi nilang, “It was worse than the ‘pineapple blooper’ of the Philippine News Agency (PNA) over the logo of the Department of Labor and Employment (DOLE).”
E talagang mas grabe ‘yan. (Hindi ba’t maging ang insignia ng Pangulo ay bumaliktad na?)
Diplomatic relations ang nalagay sa alanganin dito at suporta ng China (PROC) ang nakasalang. Nag-sorry na raw si Defense Secretary Delfin Lorenzana kay Chinese Ambassador to the Philippines Zhao Jianhua.
Sa susunod sana, kung sino man ang nakatalaga sa mga bagay na ‘yan, sana’y maging metikuluso at mapanuri sila. Kung ginawa nila ang isang trabaho at pinaglaanan ng oras, bakit hindi pa nila trabahuin nang maayos?!
Maliit na bagay siguro ang turing nila sa ganoong pagkakamali pero malaking bagay ‘yan sa relasyong diplomatiko ng Filipinas at China, lalo’t pumapasok tayo sa mainit na pakikipagrelasyon sa nasabing bansa matapos ang ilang taon ng tensiyon dahil sa isyu ng West Philippine Sea o South China Sea. Anyway, sana’y ‘masolusyonan’ ng mga kinauukulang ahensiya ng pamahalaan ang tila sunod-sunod na salto sa mga simpleng usapin ng insignia o logo.
Sabi nga, it’s so elementary.
LIPATAN NG PARTIDO,
BAROMETRO BA
PARA SA 2019 & 2022
ELECTIONS?!
Ngayong isang taon mahigit na lang at nalalapit na ang mid-term election sa 2019, mayroong ilang politiko ang nagpapakita ng ilang indikasyon kung ano ang target nila sa 2019 bilang paghahanda sa 2022 national elections.
Isa sa mga maagang ‘lumundag’ at nagparamdam ng kanyang plano ay si Quezon City mayor, Herbert “Bistek” Bautista. Mula sa Liberal Party (LP) ay muling bumalik sa Nationalist People’s Coalition (NPC) si Bistek. Ang NPC ay koalisyon ng iba’t ibang partido politikal na pinamumunuan ni Eduardo “Danding” Cojuangco.
Ang sabi, preparasyon umano ito ni Bistek para sa congressional election. Nababansagan ngayon si Bistek na ‘first honor’ o ‘valedictorian’ sa paglipat-lipat, pagpapalit-palit o paglundag-lundag ng partido depende kung paano magiging komportable ang kanyang political career.
Kumbaga sa Olympic games ay gold medalist na nga raw si Kapten Barbel Bistek!? At ramdam ni Bistek na epektibo ang kanyang taktika dahil 22 taon na siyang opisyal sa Quezon City sa iba’t ibang kapasidad.
‘Yang pagiging congressman na lang ang hindi niya nasusubukan. Nasa huling termino na bilang alkalde si Bistek. Dati na siyang nasa NPC noong 1992 hanggang 1994 bilang konsehal. Taong 1995, lumundag siya sa Laban ng Demokratikong Pilipino at nanalong vice mayor. Noong 1998, tumakbo siyang alkalde pero natalo kay Ismael Mathay Jr. Noong 2010, landslide ang kanyang pagbabalik nang tumakbong mayor sa ilalim ng LP, ang partido ni dating Speaker Feliciano Belmonte Jr., na naging mayor din ng Quezon City.
Ang anak ni Belmonte na si vice mayor Joy ay nagwagi sa ilalim ng LP pero kamakailan ay nanumpa na sa Partido Demokratiko Pilipino-Lakas ng Bayan (PDP-Laban).
At ang tawag diyan ay, ‘politika’ ng mga segurista. Abangan natin mga suki, kung muli pang papalarin si Bistek.
Langoy pa more Mayor Bistek!
Para sa mga reaksiyon, suhestiyon, reklamo at sumbong, magtext sa 0977.705.22.31 o mag-email sa [email protected]. Para sa mga nakaraang isyu ng BULABUGIN please visit https://hatawtabloid.com
