Ancajas tagumpay sa IBF title defense sa Pacquiao-Horn undercard

PINATUMBA ni Filipino protégé Jerwin Ancajas si Teiru Kinoshita ng Japan sa ikapitong round upang tagumpay na maidepensa ang kanyang IBF super flyweight belt sa undercard ng Battle of Brisbane sa pagitan ni Manny Pacquiao at Jeff Horn sa Suncorp Stadium sa Australia kahapon.

Panay bodega ang banat ng 26-anyos na si Ancajas sa karibal na Hapon na nagpasuko rito.

Napaputok na rin ang kilay ni Kinoshita sa ikalawang round na sinamantala ng Pinoy na boksingero.

Opisyal na nagtapos ang laban sa 1:53 segundo ng 7th round.

Umakyat sa 18 knockouts at 27 panalo kontra 1 talo at isang tabla ang kartada ni Ancajas na lumalaban mula sa sariling boxing stable mismo ng boss na si Pacquiao na MP Promotions.

Bumagsak sa 25 panalo, 1 tabla at 2 talo ang IBF challenger at 31-anyos na si Kinoshita. (JBU)