Kulelat ba ang intel ni Defense USec Ric David Dayunyor?

ILANG panahon rin nating na-missed ang pangalan ni ex-Immigration chief, Ric David Jr., sa pahayagan.

Undersecretary na pala siya sa Defense Department, anyway, he’s really from military, ‘di ba?!

Ang hindi natin maintindihan, batay sa nasaba nating balita sa isang pahayagan, parang kulelat ang reliability ng ‘Intelligence’ ni Usec. David.

Ayon sa Indonesian Defense Minister, 1,200 na raw ang ISIS members na nasa Filipinas.

Wattafak!?

Marami ang naniniwala rito, lalo’t maraming napapatay na dayuhan sa hanay ng Maute sa nagaganap na sagupaan ngayon sa Marawi.

Ito ay inihayag ni Indonesian Defense Minister  Ryamizard Ryacudu sa international security forum noong nakaraang Linggo.

Tinawag ni Ryacudu na ‘killer machines’ ang mga miyembro ng ISIS. Dahil ang ultimong layunin daw ng grupong ito ay pumatay ng mga tao.

Pero, ayon kay Usec. Dayunyor, hindi raw niya alam ‘yung 1,200 na sinasabi ni Ryacudu. Ang alam daw niya mayrong 250-400 ISIS sa Filipinas.

Wattafak agen?!

Paano ba natin paniniwalaan si Usec. Dayunyor, ‘e ‘yung pangyayari nga lang sa Marawi, hindi ba’t nabulaga na lang sila nang biglang lumusob ang Maute?!

‘E pakuya-kuyakoy lang ‘ata siya sa opisina niya gayong alam naman pala niya na mayroong 250-400 ISIS sa bansa?!

Que 100 o 200 pa ‘yan ‘e terorista pa rin ‘yan na naghahasik ng lagim sa bansa natin!

Tapos ‘yan, kumilos lang sila nang kubkubin ang Marawi.

Sino ngayon ang napipinsala?! Ang mga sibilyan at pamilya ng mga sundalo at pulis na naroroon ngayon sa Marawi para labanan ang ISIS.

Hindi ba puwedeng, imbestigahan munang mabuti ni Usec. Dayunyor ang sinasabi ng Indonesian Minister  bago niya i-rebat?!

‘Yan kasi ang problema sa ibang mga naitalaga ni Pangulong Rodrigo “Digong” Duterte sa kanyang administrasyon— puro retarded na ‘este retired na puro recycle pa!

Sana ay magtalaga naman ang Pangulo ng mga medyo bata-bata at hindi ‘yung recycle na wala rin naman napatunayan nang italaga sila ng mga dating pangulo.

Nasasayang po ang salapi ng bayan na ipinasusuweldo  sa  mga  recycle  na  appointee  pero  wala  na-mang mahusay na track record.

Mabibilis lang kasi silang ‘sumampay’ sa llamado pero pakaang-kaang naman kapag nabigyan ng puwesto.

‘Yung bago naman po na productive, please naman po?!

DAIG PA ANG DROGA
NG PAGKALULONG
SA SUGAL SA CASINO

Nakita natin sa kaso ni Resorts World tragedy, gunman Jessie Javier Carlos na hindi kailangang bangag sa ilegal na droga para maganap ang isang trahedya na hindi na malilimot ng sambayanan at kahit ng mga dayuhan.

Wala umanong masamang bisyo, using different kind of substances gaya ng alak at ilegal na droga si Carlos, pero grabe ang pagkalulong niya sa sugal.

Sa grabeng pagkalulong niya ay nasira ang relasyon niya sa kanyang pamilya, nasira ang trabaho at naubos ang kanyang kabuhayan.

At nang ma-realize niya kung ano ang nangyari sa kanya, naisip pa niyang gumawa ng mas matinding problema — na nadamay pati ang ibang indibiduwal na wala namang kinalaman sa nangyari sa buhay niya.

Parang lumalabas na gusto niyang gantihan ang casino, pero nadamay pa ang iba tao at mga empleyado na inaasahan ng kanilang mga pamilya.

Ang pagkawasak ng pamilya at pagkasaid ng kabuhayan ay hindi na bago sa mga nalulong sa Casino.

Paulit-ulit ang kuwentong ‘yan lalo sa mga hindi maawat at hindi makontrol ang pagkahilig sa casino.

Marami sa kanila ang nasa kama na, ‘e bigla pang  lumagapak sa sahig. Hindi na dumaan ng papag!

Bukod tangi kasi na sa mga bansang kabilang sa 3rd world, dito lang sa Filipinas na sandamakmak ang casino pero hindi naman nakatutulong sa gobyerno at sa taongbayan.

Wala rin pakialam ang mga casino rito kung bumaliktad ang bulsa at tumaob ang kabuhayan ng local players.

Hindi gaya sa ibang bansa na mismong ang casino ang nagtatakda ng limitasyon sa mga local player nila.

Sa Singapore at Macau ay mahigpit na iminomonitor ang mga local player na malakas magpatalo sa casino.

Kaya sa mga suki natin na medyo nararahuyo sa kinang ng casino, mag-isip-isip po kayo.

Wala pong ‘buenas’ at grasya sa casino.

Minsan lang ‘yan. Mas malakas ang talo at madalas disgrasya pa ang aabutin ninyo.

May kasabihan nga noon, kung may kagalit o kaaway ka ay isama at turuan mong mag-casino!

Huwag na natin ulitin ang kuwento ni Jessie Javier Carlos, na hanggang ngayon ay hindi pa natatapos ang ginawang prehuwisyo sa kapwa.

Umiwas sa casino!

Para sa mga reaksiyon, suhestiyon, reklamo at sumbong, magtext sa 0977.705.22.31 o mag-email sa [email protected]. Para sa mga nakaraang isyu ng BULABUGIN please visit https://hatawtabloid.com

BULABUGIN
ni Jerry Yap