Alfie sa pag-alis sa kanyang poder ni Juday: Naaawa ako sa kanya

WALA na sa pangangalaga ni Alfie Lorenzo si Judy Ann Santos. Ang huli mismo ang nagkompirma na umalis na siya sa kwadra ng una.

Nagpunta si Juday sa condo unit ni Alfie noong August last year para magpaalam.

Sa interview ng Pep.ph kay Alfie, sinabi nito na kahit hindi na siya ang manager ni Juday ay wala siyang balak siraan ang aktres.

“Creation ko ‘yan. Kung gusto ko ‘yan na patayin, right now, mamamatay na ‘yan. Kasi, alam mo naman ang mga Filipino, galit sila sa mga walang utang na loob. Pinalaki mo sila ng 32 years, tapos basta ka na lang iiwan. Sila ang nakiusap na huwag silang bibitawan, tapos ako pala ang ilalaglag.” sabi ni Alfie

Dagdag niya, ”Masisira siya. Pati sa mga advertisement niya, masisira siya. Nilikha ko siya, bakit ko sisiraan? Huwag na lang, hayaan niyo na.”

Ano ang naging reaksiyon niya noong nagpaalam na sa kanya ni Juday?

“Ang reaksiyon ko, naaawa ako. Sikat na siya, eh. Sikat na siya, bakit naghangad pa siya na malaos? Kasi ako ang may lutong Kapampangan, ‘yung mga makikialam na iba sa aking sangkap, maiiba ang luto, maiiba ang lasa. Sa tagal ko na sa showbiz, more than 60 years na ako, nakita ko na lahat ng pag-uumpisa nila, na-compare ko na lahat. Naaawa lang ako kay Judy Ann dahil siguro akala niya, siya ang nagdesisyon, magtutuloy-tuloy pa rin ang kasikatan niya.”

MA at PA – Rommel Placente