Friday , September 21 2018
Breaking News
You are here: Home / News / Modernisasyon ng PNR tiniyak ni Lastimoso
Modernisasyon ng PNR tiniyak ni Lastimoso

Modernisasyon ng PNR tiniyak ni Lastimoso

NAKIKIPAGPULONG ngayon ang ilang key official ng Duterte administration para makompleto ang kasunduan sa pagitan ng Filipinas (RP) at People’s Republic of China (RPoC) ukol sa ilang memorandum of understanding (MOU) na magbibigay-daan sa modernisasyon ng railway system sa bansa.

Ito ang ipinahayag ni Philippine National Railways chairman retired Gen. Roberto Lastimoso sa Tapatan sa Aristocrat media forum sa Malate, Maynila sa pagtalakay ng mga plano ng pamahalaan para sa pagtatatag ng modernong railway system na maaaring maitulad sa China at Europa.

“It will happen,” mariing sinabi ng dating hepe ng Philippine National Police (PNP) sa pag-usisa sa kanya sa kalagayan ng PNR at mga programa nitong nakatuon sa rehabilitasyon ng dating tren mula sa Tutuban hanggang Bicol Region at planong pagpapatayo ng railway system sa Mindanao at Viayas.

Ipinaramdam ni Pangulong Rodrigo Duterte ang pagnanais niyang magkaroon ng modernong railway system sa bansa na mag-uugnay sa mga rehiyon para mapabuti ang kalakalan at transportasyon.

“Sinabi ni Pangulo na ‘give me a railway’ kaya ito ang aming gagawin,” dagdag ni Lastimoso.

Tinukoy niya na mas may realidad na mauna ang rehabilitasyon ng linya mula Tutuban hanggang Legaspi dahil existing ito at kailangan lang i-refurbish.

Sumang-ayon si Department of Transportation (DoTr) rail sector senior project development officer Atty. Timothy John Batan sa pagbanggit sa ilang problemang haharapin sa pagtatayo ng bagong linya ng tren sa Visayas at Mindanao.

“Hindi na kailangan pang isaayos ang ‘right-of-way’ kung itutuloy ang rehabilitasyon ng existing train  line natin mula Tutuban patungong Bicol,” ani Batan.

Nakaplantilya sa programa ng modernisasyon ang pagpapalawig ng linya ng tren patungo sa kanluran at katimugang Luzon.

“Sa ngayon, hanggang Calamba ang ating tren pero kapag nakompleto sa 2021 ang proyekto natin dito, aabot ito hanggang Legaspi at madaragdagan pa hanggang Matnog habang sa norte ay aabot na rin sa Clark,” dagdag ni Batan. (TRACY CABRERA)

COMMENTS

About Tracy Cabrera

Scroll To Top
 

Copyright hatawtabloid.com | All Rights Reserved