Marcos, 22 pa sumalang sa PI sa DoJ (Sa pagpatay kay Mayor Espinosa)

BINIGYAN ng panel of prosecutors ng Department of Justice (DoJ) ang respondents sa pagkamatay ni Albuera, Leyte Mayor Rolando Espinosa nang hanggang 23 Enero 2017 para magsumite ng kanilang kontra-salaysay.

Una rito,  sumalang  sa  preliminary  investigation  ng  panel of prosecutors ng DoJ ang mga miyembro ng Criminal Inveatigation and Detection Group Region 8 (CIDG-8) at Maritime Police na kinasuhan ng National Bureau of Investigation (NBI) ng multiple murder at perjury kaugnay sa pagpatay kay Espinosa at kapwa niya inmate na si Raul Yap.

Ngunit napag-alamang 14 sa inireklamong  mga  pulis  ay  wala pang  mga  abogado  kaya’t  hindi  sila makapagsumite ng counter affidavit.

Dumalo sa pagdinig ang dating hepe ng CIDG-8 na si Supt. Marvin  Marcos,  ang pulis na nakabaril at nakapatay mismo kay  Mayor Espinosa na si C/Insp. Leo Laraga, at 21 pulis na sangkot  din  sa  operasyon.

Hindi  nakadalo  sa  pagdinig si Paul Olendan na ginamit ng CIDG na testigo para makakuha ng search warrant sa korte.

Sinabing  AWOL na sa serbisyo si PO2 Neil Patrimonio Sentino.

Hindi sumipot sa pagdinig ang  ang  mga  kinatawan  ng NBI  na  tumatayong complainant  sa  kaso.

Makaraan ang pagdinig, mahigpit  na  binantayan ng mga awtoridad  ang  mga inireklamo pulis  pabalik  sa Camp Crame.

(LEONARD BASILIO)