HATAW! D'yaryo ng Bayan hatawtabloid.com
SUPPORTIVE ‘ate and kuya’ talaga sina Toni Gonzaga-Soriano at asawa nitong si Direk Paul Soriano kay Alex Gonzaga dahil maski na isa sa mga araw na ito ay manganganak na ang una ay dumalo pa rin siya sa premiere night ng My Rebound Girl na ipinalabas na kahapon (Miyerkoles) produced ng Regal Entertainment na idinirehe naman ni Emman dela Cruz.
Sa tanong namin kay Toni kung kailan siya manganganak ay sinagot kami ng, “anytime this week.”
Sabi namin na maski na manganganak na siya ay pumunta siya sa premiere night ng pelikula ng kapatid, “siyempre support ako, first movie niya (Alex) ‘to. Kaya after nito (pelikula), tatakbo na ako ng hospital,” nakangiting sabi ng proud ate ni Alex.
Balik-tanong namin kay Toni kung anong pangalan ng baby boy nila ni direk Paul, “wala pa, at saka na, baka Bono (pangalan ng daddy ng TV host/actress).”
Kuwento naman ng mommy Pinty Gonzaga nina Toni at Alex na sa St. Lukes Global daw manganganak ang panganay niya anumang oras ngayong linggo.
“Sabi ng doktor niya (Toni), baka Friday na (bukas), may spotting na nga, eh,” pahayag ng proud lola.
Humirit ulit kami ng tanong kay mommy Pinty kung ano ang pangalan ng first apo nila baka sakaling madulas, “naku, sila (Paul at Toni), na lang mag-announce, sa kanila ‘yun, eh, baka Paul Jr.?”
Mabuti at pinayagan ni mommy Pinty si Alex na halikan siya sa My Rebound Girl ng leading man nitong si Joseph Marco.
“Eh, matanda na siya, 28 na, bahala siya. At saka hindi ko alam na mayroon, ngayon ko lang napanood,” sagot kaagad ng ina ng aktres.
At pinagmamasdan namin ang pamilya Gonzaga at Soriano habang nanonood sila ng pelikula na natatawa naman sila sa mga eksena.
Pressured nga lang kay Alex dahil dalawang filmmaker ang nasa audience noong sandaling iyon, sina direk Paul at daddy nitong si direk Jeric Soriano.
FACT SHEET – Reggee Bonoan
