MIAA employee na nag-uwi  ng gintong medalya binalewala ni GM Honrado?!

GINTONG medalya ang iniuwi ng isang empleyado ng Manila International Airport Authority (MIAA) para sa karangalan ng bansa mula sa 1st ASEAN Civil Service Games na ginanap sa Kuala Lumpur, Malaysia dahil sa kanyang kahusayan sa Bowling pero mukhang wala raw itong importansiya kay GM Bodet Honrado.

Magiging lubos sana ang kasiyahan ni Oscar ‘Oca’ Abuan, organic personnel ng MIAA na nakatalaga sa Ninoy Aquino International (NAIA) terminal 3 kung kikilalanin siya ng kanilang bossing.

Hindi na siguro kailangan ng seremonya. ‘Yung ipatawag lang ni GM Honrado si Abuan sa kanyang tanggapan at kamayan, aba nakatataba na ng puso ‘yun.

E ‘di lalo na kung bibigyan pa ni GM Honrado ng incentives dahil sa lahat ng mga atleta mula sa iba’t ibang  sangay ng gobyerno na pinili base sa resulta ng kanilang laro sa Government Corporation Athletic Association (GCAA) ‘e si Abuan lang ang walang Daily Subsistence Allowance (DSA) na dapat ay ibigay ng kanyang mother unit.

Ang siste pa, ni hindi rin siya nabigyan kahit ng sapatos na pamparada.

Sabi nga ni Abuan, “Kahit na walang suporta ang MIAA sa akin ay pinag-igihan ko pa rin ang laro sa bowling (individual) kaya napanalunan ko ang gold medal pero hanggang ngayon hindi pa rin ako binibigyan ng parangal ng aming general manager.”

Ani Abuan, 60 contingents mula sa 10 bansa sa Southeast Asian Nation ang lumahok sa paligsahan at ito ay kinabibilangan ng Malaysia, Singapore, Malaysia, Vietnam, Myanmar, Thailand, Indonesia, Philippines, Brunei Darrusalam at Republic of Lao.

Mantakin ninyong sa dami ng mga bansang naglaban ay nakakuha ng medalyang ginto si Oca Abuan?!

Aba, GM Honrado, ano pa ang hinihintay ninyo? Organic employee ninyo si Abuan, hindi ba karangalan ‘yang iniuwi niya, hindi lamang para sa MIAA o sa CSC kundi para sa buong bansa rin.

Oca, mabuhay ka! Tunay kang dangal ng MIAA at ng Filipinas at ikinararangal ka ng maraming Filipino!

Para sa mga reaksiyon, suhestiyon, reklamo at sumbong, magtext sa 0926.899.91.27 o mag-email sa [email protected]. Para sa mga nakaraang isyu ng BULABUGIN please visit https://hatawtabloid.com