4 arestado, 2 nakatakas sa drug raid sa Quezon

NAGA CITY – Swak sa kulungan ang apat katao habang nakatakas ang dalawa pa sa anti-drug operation ng mga awtoridad sa Brgy. Gomez, Lopez, Quezon kamakalawa.

Kinilala ang mga nadakip na sina Ronaldo Bartolome, Wilfredo Pallan, Arjon Plaganas, at Angelito Lopez, habang ang mga nakatakas ay nagngangalang Denver Bartolome at Aldrin Madera.

Napag-alaman, naglalaro ng baraha ang apat na naaresto nang sumugod ang mga pulis sa lugar habang nakita sa kuwarto ng bahay na nagsasagawa ng pot session ang nakatakas na mga salarin.

Nakipaghabulan ang dalawa sa mga pulis ngunit mabilis na nakalayo at tuluyang nakatakas habang hindi na nakapalag pa ang mga naglalaro ng baraha.

Nakuha sa apat na salarin ang siyam na sealed transparent plastic sachet na naglalaman ng shabu nang magsagawa ng body search. Habang nakuha sa kuwarto ng mga tumakas ang apat na plastic transparent sachet at mga paraphernalia.

Nakakulong na ang apat habang patuloy pang pinaghahanap ang dalawang tumakas.

Mahaharap sa kasong paglabag sa RA 9165 at PD 1602 ang mga suspek.