Trike driver tigok sa energy drink

PATAY ang isang 23-anyos tricycle driver makaraan uminom ng energy drink bago sumabak sa paglalaro ng basketball kamakalawa ng hapon sa Caloocan City.

Kinilala ang biktimang si Jerome Paraiso, ng Block 6, Tanigue St. kanto ng Labahita St., Dagat-Dagatan, Brgy. 14 ng nasabing lungsod, na-comatose sa Caloocan City Medical Center (CCMC) ngunit namatay makaraan ang ilang oras.

Ayon sa ama ng biktima na si Guillermo, 43, dakong 4:30 p.m. nang mahilo at mawalan ng malay ang anak sa harap ng mga kalaro sa basketball sa loob ng Macario Asistio Elementary School Annex sa nasabing barangay.

Naghahanda ang biktima at mga kaibigan upang maglaro ng basketball nang maganap ang insidente.

Bago ito ay uminom muna ng energy drink ang biktima na madalas niyang gawin bago at makaraan mamasada.

Patuloy na iniimbestigahan ng mga awtoridad ang insidente.

Rommel Sales