Adult diapers inisnab ng ilang MMDA personnel
hataw tabloid
January 10, 2015
News
HINDI sinunod ng ilang traffic officers at crowd control personnel ang utos ng Metro Manila Development Authority na magsuot sila ng adult diapers habang nagbabantay sa prusisyon ng Itim na Nazareno kahapon.
Nauna rito, inihayag ng MMDA na kailangang magsuot ng adult diapers ang traffic officers at crowd control personnel na magbabantay sa pagbisita ni Pope Francis.
Sinabi ni MMDA official Emerson Carlos, ang pagsusuot ng diapers ay magkakaroon ng trial run sa prusisyon ng Itim na Nazareno.
“These diapers are actually being used regularly as standard operating gear for soldiers belonging to the North Atlantic Treaty Organization (NATO) and the United States Army to fight Talibans in Afghanistan since 2012. Even the Buckingham Palace guards,” pahayag ni Carlos.
MMDA personnel napahiya sa diaper
AMINADO ang ilang traffic constables ng Metropolitan Manila Development Authority (MMDA) na napahiya sila sa publiko makaraan ihayag ni MMDA Chairman Francis Tolentino ang pagpapasuot sa kanila ng diaper.
Sinabi ng ilang enforcer, (na ayaw magpabanggit ng pangalan), walang problema sa kanila kung pasusuutin sila ng diaper, ang kanilang sentimyento ay hindi na sana inianunsyo sa publiko ni Tolentino na pagsusuutin ng diaper ang mga nakatalaga sa piyesta ng Itim na Nazareno sa Maynila.
Umani ng batikos ang mga enforcer dahil sinasabing ang mga baby lamang at ang mga maysakit na nakahiga at hindi na kayang bumangon ang dapat magsuot ng diaper.
Sa panig ng tanggapan ni Tolentino sa pamamagitan ng Public Information Office (PIO) ng MMDA, hindi compulsory o sapilitan ang pagpapasuot ng diaper kundi kung sino lamang ang may gusto.
Jaja Garcia