HATAW! D'yaryo ng Bayan hatawtabloid.com
NATUTUWA kami sa ipinakikitang outlook sa buhay ng aktres na si Sunshine Cruz. Magka-chat kami noong isang madaling araw. Napakahabang chat iyon. At nagkukuwento nga siya sa amin kung gaano kasaya ang kanyang buhay ngayon na wala siyang iniisip kundi ang magtrabaho at ang kanyang mga anak. Talagang ang trabaho ni Sunshine ngayon halos walang pahinga, pero masaya siya dahil sinasabi nga niyang para naman iyon sa kanyang mga anak. Ang buhay kasi ni Sunshine ngayon ay halos single parent sa tatlo niyang anak.
Liwanagin natin ha, ang sinabi namin, halos single parent siya sa kanyang mga anak.
Ipinagmamalaki ni Sunshine ang kanyang mga anak, dahil matatalino ang mga bata. Marami nga raw nakukuhang honors ang mga iyon mula sa kanilang eskuwelahan. Ang mas nakapagpapasaya kay Sunshine, malambing daw sa kanya ang kanyang mga anak at happy na sila sa kanilang sitwasyon kahit na sabihing medyo hirap, medyo hindi nila nakukuha ang buhay na kagaya ng dati. Pero dahil kasama nila ang kanilang ina, happy na rin sila.
