Inang buntis, 10-anyos anak utas sa Samar (Pamilya nabagsakan ng bato)

TACLOBAN CITY – Patay ang isang buntis at ang kanyang 10-anyos anak makaraan madaganan ng malalaking bato ang kanilang barong-barong sa Maharlika Highway, Brgy. Cagnipa, sakop ng Lungsod ng Calbayog sa Samar kamakalawa.

Kinilala ang mga namatay na sina Marife Monteves, 37, siyam na buwan buntis, at ang kanyang anak na si Danica.

Habang nakaligtas sa trahedya ang ama na si Danilo Monteves at dalawang anak nilang sina Diana, 9, at Danilyn, 5, nagkaroon nang malalalim na sugat sa katawan, ginagamot sa St. Camillus Hospital sa Calbayog City.

Ayon kay Danilo, naiidlip sila sa loob ng kanilang barong-barong dakong 1 p.m. nang bigla nilang narinig ang rumaragasang malakas na tunog na dumiretso sa kanilang tirahan.

Dalawang malalaking tipak ng bato na pinaniniwalaan galing sa itaas ng bundok ang tumama sa kanyang misis at sa kanyang anak na babae na naging sanhi ng agarang pagkamatay ng dalawa.

Sinabi ni Danilo, siya at ang kanyang bunsong mga anak ay mabilis na nakakilos at nakapagtago sa isang sulok ng kanilang tirahan kaya maswerteng nakaligtas.