HATAW! D'yaryo ng Bayan hatawtabloid.com
DAHIL sa ipinakitang determinasyon at lakas ng loob, makatatanggap ng bonus si Filipino figure skater Michael Christian Martinez, ang solong pambato ng Filipinas sa Winter Olympic Games sa Sochi, Russia.
Bagama’t walang naiuwing medalya, nag-iwan ng marka sa mga manonood sa galing ng kaniyang performance mula sa preliminary round hanggang sa medal round.
Pagkakalooban ng business tycoon Manny V. Pangilinan, ng $10,000 o mahigit P450,000 na gantimpala si Martinez dahil sa ibinigay na pagkilala at karangalan sa Filipinas.
Nagpasalamat si Martinez sa mga kababayan na nagdasal at sumuporta sa kaniyang laban.
“Sobrang saya. Sobrang nakakataba ng puso,” ani Martinez.
Nangako si Michael na pagbubutihin ang susunod niyang kompetisyon sa bansang Bulgaria sa sunod na linggo upang muling mai-represent ang Filipinas sa susunod na Olympics na gagawin sa South Korea.
“My goal is to compete again in the next Olympics.”
PALASYO FULL SUPPORT SA 2018
UMAASA ang Malacañang na makakakuha ng sapat na suporta sa mga kapwa Filipino, lalo sa pribadong sektor, si Filipino Olympian Michael Christian Martinez, sa kanyang paghahanda para sa iba pang kompetisyon, gaya ng 2018 Olympics.
Ani Deputy presidential spokesperson Abigail Valte, napatunayan ni Martinez na karapat-dapat ang atensiyon at ayuda ng mga kababayan, hangad niya na dumagsa ang donasyon para sa atleta dahil hindi biro ang preparasyon para sa 2018 Olympics.
“It’s a long road to 2018 and we wish him the best of luck. Undeniably (his performance) will attract more attention for him and hopefully donors from the private sector will come,” ani Valte.
Sinuportahan aniya ng Philippine Sports Commission (PSC) at ilang pribadong kompanya ang pagsali ni Martinez sa Winter Olympics at nasungkit niya ang ika-19 puwesto.
“With the attention he has received and the heart he has shown everybody, siguro mas ma-improve ang situation,” dagdag ni Valte.
(ROSE NOVENARIO)
