Wednesday , October 21 2020
Breaking News
You are here: Home / Bulabugin / Ang ‘Napoles Agimat’ ni daddy ipinasa kay dayunyor (Like father like son)

Ang ‘Napoles Agimat’ ni daddy ipinasa kay dayunyor (Like father like son)

00 Bulabugin JSY

ANG tawag na raw talaga ngayon sa ‘Plenary Hall’ ng Senado, na minsang minarkahan ng mga tunay na statesman na sina Claro M. Recto, Lorenzo Tañada, Jose W. Diokno at iba pang lumikha ng kasaysayan sa Philippine politics, ay “ENTABLADO NG KASINUNGALINGAN.”

Mantakin n’yo naman, palagay natin ay ‘matikas’ ang pinaghiraman ng ‘kapal ng mukha’ ni Senator BONG REVILLA dahil talagang walang kurap nang ihayag niyang wala siyang kinalaman sa P10-billion pork barrel scam.

Pero hindi raw basta nanghiram lang ng ‘KAPAL NG MUKHA’ si Sen. Bong kundi ipinamana raw pala ni Daddy ang ‘agimat ni Napoles.’

Ay sus… like father, like son pala?!

Ayon mismo sa whistleblower na si Benhur Luy, isa si dating Sen. Ramon Revilla, Sr., sa mga unang kliyente ni Janet Lim Napoles kung paano ida-divert ang kanyang pork barrel sa mga pekeng non-government organizations (NGOs).

Ayon kay Luy, sa pagitan ng 2003 at 2004, umabot sa P35 milyon ang nai-channel ng matandang Revilla mula sa kanyang Priority Development Assistance Fund (PDAF) sa  mga local government units gaya sa Clarin, Misamis Oriental (P10 million); San  Quintin, Pangasinan (P5 million); Porac, Pampanga (P5  million); Siniloan, Laguna (P5 million); San Juan, Leyte (P5  million); at Dawis, Bohol (P5 million).

Gamit umano sa implementasyon ng nasabing project ang kompanyang Jo Chris Trading para sa delivery ng Foliar Fertilizer.

Ang Jo Chris ay main trading firm ni Napoles na ipinangalan sa kanyang anak na babae.

Panahon pa umano ng matandang Revilla, ang tao na nilang si Richard Cambe ang nakikipag-ugnayan kina Luy at Napoles lalo na kapag kuhaan na ng ganansiya.

‘E ano ‘yung sinasabi ni Dayunyor na ang tatay umano niya mismo ang nagsabi sa kanya na magsalita para ipagtanggol ang kanilang pamilya at dangal (name and honor)?

Baka ipagtanggol ang pakinabang at ganansiya hindi ang “name and honor”?

May alam tayong kasabihan, “Less talk, less sin.”

Kapag naakusahan na, mas mabuti pang manahimik na lang. ‘Yang pagiging madaldal at maingay ‘e parang paglusong sa kumunoy. Habang kumikilos ay lalong nababaon …habang nagdadaldal ay lalo lang lumulutang ang mga ebidensiya at lumalabas sa sariling bibig ng akusado.

Okey na sana ‘yung kayo na lang mag-TATAY ang naglolokohan, huwag na ninyong isama ang sambayanang Pinoy sa lokohan ninyo.

Gusto n’yo pang LUMUSOT, ‘e swak na swak na nga kayo.

Ay sus!

Para sa mga reaksiyon, suhestiyon, reklamo at sumbong, magtext sa 0915.804.76.30 o mag-email sa [email protected] Para sa mga nakaraang isyu ng BULABUGIN please visit https://www.hatawtabloid.com

About hataw tabloid

Leave a Reply

Your email address will not be published. Required fields are marked *

*

Scroll To Top