HATAW! D'yaryo ng Bayan hatawtabloid.com
Patay ang 73 -anyos landlord, matapos pagbabarilin sa tapat ng internet shop ng dalawang lalaki na nakasakay sa tricycle, sa Pasig City kahapon ng madaling araw.
Kinilala ni P/chief Insp. Glenn Magsino, hepe ng SIDMB ng Pasig City Police ang biktimang si Rodolfo Oregas, negosyante, residente ng #176 Dr. Pilapil St., Brgy. Sagad, sa nasabing lungsod.
Tumakas ang mga suspek sakay ng kulay orange na tricycle may body no. 328.
Sa ulat, naganap ang pamamaril dakong 4:00 ng madaling araw sa Dr. Pilapil St., tapat ng A-Site Internet Café, Brgy. Sagad.
Ayon sa isang parokyano ng internet shop, nakarinig siya ng sunod-sunod na putok ng baril at kanyang nakita ang suspek papasakay sa isang tricycle, nakasuot ng itim na jacket at sombrero, may bitbit na baril.
Nakita rin ng testigo ang duguang katawan ng biktima na nakahandusay sa kalsada na tila patay na.
Sa imbestigasyon ng pulisya, pitong tama ng bala ang nakita sa katawan ng biktima sanhi ng kanyang agarang kamatayan.
Ang biktima ay may-ari ng mga paupahang apartment sa nasabing lugar.
Isang masusing imbestigasyon ang isinasagawa ng pulisya para mabatid ang motibo ng pamamaslang at para matukoy ang mga suspek mula sa kuha ng CCTV camera.
ni MIKKO BAYLON
