Tuesday , September 29 2020
Breaking News
You are here: Home / Sports / Batak sa laban si Fajardo

Batak sa laban si Fajardo

MALAKING bagay talaga ang pangyayaring naging miyembro ng Gilas Pilipinas si June Mar Fajardo!

Nahasa siya nang husto sa national team.

Hindi lang siya ang naitokang makipagbanggaan kay Marcus Douthit sa practices. Kahit paano’y nadagdagan ang kanyang karanasan sa pakikipagsalpukan sa mga malalaking nakatagpo buhat sa iba’t ibang koponan kahit pa hindi naman mahaba ang kanyang naging playing time.

Ang lahat ng karanasang ito ay nagamit niya nang husto sa Governors Cup kung saan tumaas nang husto ang kanyang mga numero.

Aba’y kung ganito ang kanyang mga numero mula pa noong Philippine Cup, puwedeng siya ang nahirang na Rookie of the year.

Pero tapos na iyon at ang karangalan ay napunta kay Calvin Abueva na naging consistent mula umpisa. Natulungan pa nga ni Abueva na magkampeon ang Alaska Milk sa Commissioner’s Cup.

Sina Fajardo at Abueva ang siyang susundan ng mga PBA fans sa mga susunod na seasons. Siya ang bagong bayani ng liga.

Dominante man si Fajardo sa kampo ng Petron, kailangan pa rin niya ng makakatulong. Kasi para bang siya lang naging big man ng Bosters. Paretiro na ang two-time Most Valuable Player na si Danilo Ildefonso na siyang nagtuturo din sa kanya. Hindi na siguro ito makakasabay sa mga batang big men.

Kaya naman kakailanganin din ng Petron na kumuha ng isa pang big man buhat sa susunod na Draft upang hndi naman mahirapan nang husto si Fajardo.

Nakita naman ng lahat ang kakulangang ito sa nakaraang Finals kung saan pinagtulungan ng mga big men ng SanMig Coffee si Fajardo. Pinagod. Kinuhanan ng fouls.

Kung may makakatulong si Fajardo sa mga susunod na seasons, tiyak na aani ng sunud-sunod na tagumpay ang Petron.

Sayang lang kung pababayaan lang ng Petron na mag-isa si Fajardo sa gitna, e.

Sabrina Pascua

About hataw tabloid

Leave a Reply

Your email address will not be published. Required fields are marked *

*

Scroll To Top