Male talent, iti-next si direk — Wala akong pinatulang iba

TINAWAGAN kami ni direk at nangumbida na mag-coffee talk daw. Ok lang naman sa amin dahil doon naman sa coffee shop na tambayan namin talaga. Nakikiusap din si direk, huwag na daw naming i-blind item dito sa Hataw iyong isa niyang male talent na naging lover din niya.

Ipinakita niya sa amin ang text message niyon na ang sinasabi, ”hindi naman ako pumatol sa iba, sa iyo lang. Walang nakagagalaw sa akin kundi ang misis ko at ikaw lang. Hindi naman ako call boy. Ginagawa ko naman kung ano ang makakaya ko kung nagkikita tayo. Siguro nga kung minsan hindi nasusulit ang pagod mo at pera mo, pero ginagawa ko naman ang makakaya ko. Bakit naman nasulat pa sa ‘Hataw’ pati iyong mga picture natin,” sabi ng male star sa text.

Mukhang si direk naman, hanggang ngayon in love pa rin sa male star, kaya sige na lang hindi na namin iba-blind item ang relasyon nila. Ang laman lang naman ng blind item namin ngayon iyong text ng male star sa kanya. Hindi ang tungkol sa kanilang relasyon, at mga picture, at video.

HATAWAN
ni Ed de Leon