Mag-asawang senior citizens hinataw ng kawatan

TAYABAS, Quezon – Kapwa sugatan ang matandang mag-asawa mula sa hataw sa mukha ng hindi kilalang suspek na nanloob sa kanilang bahay sa bayang ito, nitong Sabado ng madaling-araw.

Salaysay ng residenteng si Mark Labaro, nakita niyang duguan at palakad-lakad ang mga biktimang sina Tessa Pabino, 62, at Robert Albiña, 65, kaya dinala niya sa pagamutan.

Ikinuwento aniya ng mag-asawa na hinampas sila ng dos por dos na kahoy ng magnanakaw na pumasok sa kanilang barong-barong.

Narekober ng mga awtoridad ang kahoy sa pinangyarihan ng insidente.

Walang anak ang mag-asawang nagpapagaling pa rin sa ospital, ayon sa kanilang pamangkin.

Patuloy ang imbestigasyon ng mga awtoridad sa insidente.