HATAW! D'yaryo ng Bayan hatawtabloid.com
NAGMISTULANG referee si Sen. Manny Pacquiao at iba pang mga senador dahil sa pag-awat sa muntikang pagpapang-abot nina Sen. Antonio Trillanes at Sen. Juan Miguel Zubiri.
Ito’y makaraan pagtalunan ng dalawa ang isyu ng posibleng whitewash sa imbestigasyon sa bribery scandal sa Bureau of Immigration (BI).
Nag-ugat ang bangayan sa pahayag ni Zubiri na dapat ang Senate Blue Ribbon Committee na pinamumunuan ni Sen. Richard Gordon ang mag-imbestiga sa sinasabing panunuhol ni Jack Lam sa ilang BI officials, bagay na hindi sang-ayon si Trillanes.
Naunang sinabi ng dating sundalo na pinuno ng Senate Committee on Civil Service, Government Reorganization and Professional Conduct, na iimbestigahan ng kanyang komite ang kontrobersiya. Sa gitna ng kanilang pagtatalo, sinabi ni Trillanes, dapat ay maging handa sa giyera si Zubiri bagay na lalong nagpagalit sa senador kaya dinuro ang kasamahang mambabatas.
Matapos ang pagtatalo, nagkamayan ang dalawa makaraan mamagitan ng ibang mga senador.
(N.ACLAN/C.MARTIN)
