Ginebra vs Blackwater

KAHIT na pansamantalang kapalit lang ni Paul Harris si Justin Bronwlee ay ibubuhos pa rin nito ang makakaya upang tulungan ang Barangay Ginebra na makapamayagpag sa PBA Governors Cup.

Makakatapat ni Brownlee ang datihang si Eric Dawson sa salpukan ng Gin Kings at Blackwater Elite mamayang 7 pm sa Smart Araneta Coliseum sa Quezon City.

Magkikita naman ang Rain Or Shine at Meralco sa unang laro sa ganap na 4:15 pm.

Nakabawi ang Gin Kings sa 109-100 overtime na pagkatalo sa Alaska Milk nang magwagi sila laban sa NLEX (85-72) at Meralco (107-93) upang umangat sa solo third place sa record na 2-1.

Ang Elite, na may 1-2 karta, ay galing naman sa 98-92 kabiguan buhat sa Rain Or Shine.

Sinabi ni Brownlee na naiintindihan niya ang kanyang papel sa Barangay Ginebra at hindi naman sasama ang kanyang loob sakaling ibalik si Harris kapag magaling na ang kamay nitong nagtamo ng injury sa unang laro ng Gin Kings kontra Globalport noong Hulyo 16.

( SABRINA PASCUA )