Serial rapist utas sa kuyog ng taongbayan

KALIBO, AKLAN – Brutal na kamatayan ang sinapit ng isang lalaki na sinasabing serial rapist, nang pagtulungan siyang bugbugin, tagain at pagbabarilin ng taong bayan sa bulubunduking bahagi ng Brgy. Alas-as, Madalag, Aklan kamakalawa.

Idineklarang patay sa Aklan Provincial Hospital ang biktimang si Abonjo Niñofranco, 46, hiwalay sa asawa, at residente ng Sitio Nailong, Brgy. Mamba sa nasabing bayan.

Batay sa imbestigasyon ng Madalag PNP, hinanap ng mga mamamayan ang suspek mula sa tatlong magkakatabing bayan.

Lumilitaw na naka-istambay ang biktima nang sugurin siya ng mga armadong kalalakihan at pinagtulungang bugbugin, tagain at barilin sa likod hanggang  bumulagta sa pampang ng ilog na kanyang tinakbuhan.

Nagawa pang maisugod sa ospital ang biktima ngunit idineklarang dead on arrival.

Sinasabing halos apat kababaihan na ang ginahasa ng suspek habang dumaraan sa kagubatan, at ilan sa kanila ay mga estudyante.

Ilan pa sa mga kasong kinakaharap ng suspek ay attempted parricide at arson na isinampa ng kanyang misis makaaan sunugin ang kanilang bahay.

Ayon sa ulat, tumatambay sa itaas ng mga punong kahoy ang suspek at kapag may naispatan na pupuntiryahing babae ay tinututukan ng dalang itak saka ginagahasa.