MARAMI tayong kababayan ang gustong umuwi sa Pilipinas dahil sa sinasabi nilang ‘change is coming’ sa bagong admistrasyon ni Incoming President Rodrigo Duterte.
Isa na rito ay ang Asia’s Singing Sensation na si Clifford Allen Estrala. Bagamat nagkaroon siya ng chance na magkaroon ng mga show sa US, excited na siyang umuwi sa ‘Pinas sa darating na September. Nabigyan daw ng bagong pag-asa ang mga Pinoy sa pamumuno ni Duterte. Sana raw ay mapagtuunan din ng pansin ng bagong Pangulo ang ikakaunlad ng music at movie industry. Hindi lang droga ang kailangan niyang sugpuin kundi pati ang mga pirata.
May nilulutong solo show si Clifford sa pag-uwi niya sa Pilipinas. Gusto rin niyang asikasuhin ang kanyang second album. Matatandaang na-nominate si Clifford sa PMPC Star Awards for Music bilang Best New Male Recording Artist noong 2013.
Bago tumuloy sa Pilipinas si Clifford ay dadaan muna siya sa Macau at Hongkong sa Agosto. Gusto niya munang maka-bonding ang mga friend niya roon. Dating nagtatrabaho si Clifford sa Venetian Hotel sa Macau at na-feature sa MMK ang kanyang life story na ginampanan ni Erik Santos bilang OFW singer. Isinakripisyo niya ang trabahong ito noong magkaroon ng conflict sa schedule dahil sa mga show sa US. Hindi naman nagsisisi si Clifford dahil pabalik-balik na siya sa mga show sa Amerika. Sa sarili niyang diskarte at pagpupunyagi ay patuloy na lumalawig ang kanyang singing career.
TALBOG – Roldan Castro