SSS pension hike veto override lumakas sa Kamara

NADAGDAGAN pa ng suporta ang resolusyon na naglalayong i-override ang veto ni Pangulong Benigno Aquino III sa SSS Pension Hike Bill.

Kamakalawa ng gabi ay umabot na sa 103 ang bilang ng mga kongresistang lumagda para rito.

Ngunit kapos pa rin ito para abutin ang kailangang 192 pirma para maisakatuparan ang override.

Sa kanyang privilege speech, muling nakiusap si Bayan Muna Party-list Rep. Neri Colmenares sa mga kapwa niya kongresista na suportahan ang kanilang resolusyon.

Ayon sa kongresista, ang dagdag pension ay hindi lamang isyung pang-eleksiyon kundi napakahalaga nito para sa senior citizens na hirap ngayong makabili ng gamot at makakain nang maayos dahil sa kakapusan nang mapagkukunan ng pinansiyal na tulong.

Iginiit niyang hindi totoong malulugi ang SSS kung ibibigay ang P2,000 dagdag pensiyon.