Tolentino no. 9 na (Sa senatorial survey)

ISA si independent senatorial candidate Francis Tolentino sa mga tinukoy ng Issues and Advocacy Center (The Center) na malaki ang tsansang manalo bilang senador sa halalan sa Mayo.

Sa isang non-commissioned survey na ginawa ng The Center mula Abril 11-16 na may 1,800 respondents, nakakuha si Tolentino ng 33.2 percent para sa 9-10 posisyon kasama si incumbent Sen. Serge Osmena. Ang nasabing survey may 98 percent confidence level at margin of error na 2.5 percent.

Ayon sa The Center, kung ngayon gagawin ang halalan, siguradong makakukuha si Tolentino ng upuan sa Senado.

Umakyat si Tolentino ng dalawang posisyon kompara sa nakaraang survey ng The Center noong April 1-7, tabla siya sa ika-11 hanggang ika-13 puwesto.

Bukod sa Pulso ng Pilipino survey, umangat din si Tolentino sa nakaraang survey ng Social Weather Stations (SWS) sa ika-14 puwesto na may 24 percent.

Ayon sa SWS, kabilang si Tolentino sa lumalaban para sa ika-8 hanggang huling puwesto sa senatorial race.

Isa sa mga nakatulong sa pag-angat ni Tolentino sa survey ang patuloy na suporta ni presidential candidate at Davao City mayor Rodrigo Duterte sa kanyang kandidatura.

“Nakikiusap ako sa inyong lahat na iboto ninyo sa Senado si Francis Tolentino,” wika ni Duterte, ang nangungunang presidentiable sa mga nakalipas na survey.

Para kay Duterte, si Tolentino ay isang disenteng tao, masipag na lider at epektibo sa kanyang tungkulin.

Isang abogado, si Tolentino ang kinikilala na nag-angat sa Tagaytay City upang maging nangungunang “tourist destination” bilang alkalde ng lungsod mula 1995-2004.