Guro sa Leyte, patay sa saksak ng ex-BF (Sa labas ng classroom)

TACLOBAN CITY- Naglunsad na ng manhunt operation ang mga pulis ng Maasin City laban sa ex-boyfriend na suspek sa pagpatay sa isang guro sa labas mismo ng silid-aralan sa Libertad Elementary School kamakalawa.

Ayon kay Supt. Avelino B. Doncillo, hepe ng Maasin PNP, kinilala ang biktimang si Angelica Miole, 23, Grade 5 teacher at residente ng Brgy. Bactul II, sa nasabing siyudad.

Habang kinilala ang suspek at dating kasintahan ng biktima na si Jonathan Fernandez, 31, residente ng Brgy. Combado.

Ayon sa estudyante ng biktima na nakakita sa krimen, nagtuturo sa kanila ang nasabing guro nang dumating ang suspek at tinawag ang biktima.

Ngunit paglabas ng guro ay agad siyang sinaksak ng suspek hanggang sa mawalan ng malay.

Mabilis na nakatakas ang suspek gamit ang kanyang motorsiklo ngunit sa hindi kalayuan ay naaksidente kaya naiwan ang motorsiklo at kanyang bag pack.

Sa ngayon, hindi pa malaman kung ano ang motibo ng pananaksak at nagpapatuloy ang pagtugis sa suspek.