Consultants ‘di kasambahay (Iginiit ni Sen. Sonny Trillanes)

MARIING itinanggi ni Senador Antonio “Sonny” F. Trillanes IV ang alegasyong ginagamit niya ang pondo ng Senado para sa kanyang mga personal na gastos at pagpapasuweldo sa kanyang mga kasambahay.

Ani Trillanes: “Ang mga pangalang inilabas sa isang pahayagan ay mga tunay at legal na consultant. Ilan sa kanila ay kinuha bilang mga confidential agent para sa kasalukuyang imbestigasyon sa Senado ukol sa mga anomalyang kaugnay kay VP Binay; habang ang iba naman ay gumagawa ng field research, staff work, at iba pang kaugnay na gawain na iaatas sa kanila.”

Dagdag ni Trillanes, ang isyu kaugnay sa mga consultant ay dati nang inilinaw ng Commission on Audit, at hanggang ngayon ay walang inilalabas na notice of disallowance ukol sa isyu.

Dati nang nagpulong ang Senado at COA at napag-usapang walang ilegal sa mga gastos ng mga Senador para sa mga consultant nito.

“Naniniwala ako na ang malisyosong isyu na ‘to ay inilabas upang siraan at pagdudahan ang aking mga ginagawa kontra korupsiyon. Nakulong ako nang mahigit pitong taon dahil sa aking mga adbokasiya at hindi ako hihinto dahil lang sa isyung ito. Gayonpaman, hinihiling ko ang inyong patuloy na tiwala na ang pondong inilaan sa aking opisina ay ginagamit sa tama at hindi ibinubulsa,” diin ni Trillanes.

HATAW News Team