LGU dapat magpasa ng cultural properties– NCCA
hataw tabloid
June 22, 2015
News
IPINAALALA ng National Commission for Culture and the Arts (NCCA) sa mga lokal na pamahalaan ang atas na ilista ang lahat ng cultural properties sa kanilang nasasakupan upang maiwasang masira ito ng ano mang proyekto ng pribadong sektor.
Ito’y kasunod ng pagpapatigil ng Korte Suprema sa kontrobersyal na Torre de Manila, tinaguriang ‘photo bomber’ ng bantayog ni Dr. Jose Rizal sa Luneta Park sa Maynila.
Inihayag ni Atty. Trixie Angeles, legal counsel ng NCCA sa kaso ng Torre de Manila na: “Nananawagan kami sa mga lokal na pamahalaan kasi ayon doon sa bagong batas, Republic Act 10066 (National Cultural Heritage Act), may obligasyon po sila na mag-conduct ng survey o cultural mapping at ilista po lahat ng cultural property na nasa locality nila at gumawa ng isang registry doon sa mga local government.”
Mula sa mga nasabing listahan na regular na ipapasa sa NCCA ay bubuuin ng komisyon ang Phillipine Registry of Cultural Property.
Ngunit reklamo ng abogado, “Sa ngayon po, wala pa ni isang local government na nagsusumite sa amin ng kanilang registry. At ito’y labag sa batas dahil ang deadline nila ay 2013 kung kaya’t nanawagan kami na bago namin maisipan na maghabla ng mga administrative sanctions laban sa mga local government officials na nagpapabaya rito, e magsumite na sila. “
Hinihikayat din ni Angeles ang publiko na ipilit sa kanilang lokal na pamahalaan na magpasa na ng naturang listahang makatutulong sa mga developer na matukoy ang limitasyon sa mga proyektong maaaring makaapekto sa mga cultural site.
Inulit din ni Angeles ang posisyon ng NCCA na payag silang bawasan ang palapag ng Torre de Manila imbes na gibain nang tuluyan ang kabuuan ng 46-palapag na condominium project.