BINARIL ang isang pedicab driver ng kanyang operator nang utangin ng biktima ang kanyang boundary sa Pasay City kamakalawa.
Nilalapatan ng lunas sa Pasay City General Hospital ang biktimang si Mario Alejandrino, 48, residente ng 829 B. Mayor St., Brgy-177, Malibay ng naturang lungsod.
Habang pinaghahanap ng mga pulis ang suspek na si Roy Bacabac, 47, may asawa, pedicab operator, nakatira sa 829 B. Mayor St., ng nabanggit na lungsod.
Sa report na natanggap ni Pasay City Police Officer-In-Charge (OIC), Senior Supt. Joel Doria, naganap ang insidente dakong 3:30 p.m. sa labas ng bahay ng suspek sa naturang lugar.
Napag-alaman, inuutang ng biktima ang boundary niya ngunit ayaw pumayag ng suspek hanggang magtalo sila.
Sa kainitan ng pagtatalo, binunot ng suspek ang kanyang baril at pinaputukan ang biktima at pagkaraan ay mabilis na tumakas.
Jaja Garcia