Mag-ama patay sa hagupit ni Dodong (Sa Aparri, Cagayan)
hataw tabloid
May 12, 2015
News
KINOMPIRMA ng National Disaster Risk Reduction and Management Council (NDRRMC) na dalawa ang namatay sa paghagupit ng bagyong Dodong.
Sa press briefing ng ahensiya nitong Lunes ng umaga, inihayag nila na namatay ang mag-ama nang makoryente habang nag-aayos ng bubungan nila sa Cagayan nitong Linggo.
Kinilala ang mga biktimang sina Rogelio Paa, 74-anyos, at si Neil Paa, 46, mga residente ng Brgy. Mabanguc sa Aparri, Cagayan.
Dahil sa isang service drop wire kaya nakoryente ang dalawa, ayon sa pulisya.
Naisugod pa ang mga biktima sa Bangag Medicare Hospital ngunit hindi na umabot nang buhay.
Sa Sta. Ana, Cagayan nag-landfall ang Bagyong Dodong dakong 4:45 p.m. nitong Linggo.
Storm signal nakataas pa rin sa 4 lugar (Dodong bahagyang bumilis)
BAHAGYANG bumilis ang Bagyong Dodong habang kumikilos papalayo ng bansa kahapon.
Nananatili ang lakas ng hangin ng bagyo sa 160 kilometers per hour (kph) malapit sa gitna at pagbugsong umaabot sa 195 kph.
Balik ang pagkilos ng bagyo sa 20 kph pa-hilaga hilagang-kanluran at huling namataan sa layong 65 kilometro hilaga hilagang-silangan ng Basco, Batanes.
Papalayo man sa bansa, apat na lugar pa rin sa Northern Luzon ang nasa ilalim ng babala ng bagyo.
Asahan pa rin sa mga naturang lugar ang malakas na pag-ulan at hangin maging sa posibleng pagbaha at pagguho ng lupa.
Gayonpaman, inalis na ng PAGASA ang banta ng storm surge sa ano mang bahagi ng bansa.
Nakikinita ng PAGASA na hihina sa susunod na mga sandali ang bagyo dahil sa wind shear at tatahakin na ang diretsong hilagang-silangan.
Inaasahan pa ring ngayong umaga lalabas ng Philippine Area of Responsibility (PAR) si Dodong.