Bombero nagbaril sa sarili (Pagkatapos mamaril nang walang habas)

PATAY ang isang tauhan ng Bureau of Fire Protection (NBP) nang magbaril sa ulo  makaraan walang habas na magpaputok ng baril sa Valenzuela City kahapon ng madaling-araw.

Hindi na umabot nang buhay sa Global Pacific Hospital ang biktimang si Gerome Buenaventura, 29, residente ng 1289 Que Grande, Brgy. Ugong sanhi, sanhi ng tama ng bala ng .9mm caliber pistol sa ulo.

Sa ulat kay Senior Supt. Rhoderick Armamento, hepe ng Valenzuela City Police, naganap ang insidente dakong 3 a.m. sa Bernardino St., Brgy. Ugong.

Bigla na lamang nagpaputok nang walang habas ang biktima na inawat ng misis niyang si Abigail at tatay na si Crisologo.

Salaysay ng isang vendor, inaayos niya ang kanyang paninda nang dumating ang biktima at pilit siyang pinauuwi at nang hindi siya sumunod ay pinutukan siya nang dalawang ulit ngunit hindi siya tinamaan.

Tinangka rin awatin ang biktima ng pinsan niyang si Joie Batimana ngunit biglang itinutok ni Buenaventura ang baril sa sentido at ipinaputok ito.

Isinugod ang biktima sa nabanggit na pagamutan ngunit hindi na umabot nang buhay.

Inaalam pa ng mga awtoridad ang dahilan nang pagwawala ng biktima bago nagpakamatay.

Rommel Sales