2 dalagita pinatay ng 2 stepfather

DALAWANG dalagita ang karumal-dumal na pinatay ng dalawang stepfather sa Cebu at Sorsogon, kamakalawa.

Sa Cebu, pinagsasaksak ng isang padre de pamilya hanggang mapatay ang dating karelasyon ng kanyang stepdaughter na tomboy sa Sitio Laguna, Brgy. Loriega, San Miguel, sa nasabing lungsod kamakalawa ng gabi.

Kinilala ang biktimang si Dina Zamora, 18, at residente ng Sitio Dakit, Brgy. Guadalupe nang nasabing lungsod.

Habang ang suspek ay kinilalang si Ronalio Opura, 55, may asawa, at residente sa nasabing lugar.

Ayon kay SPO2 Romel Bangcug ng Cebu City Police Office Homicide Section, hiwalay na ang stepdaughter ng suspek na si Rose Ann Opura at ang biktima ngunit gumawa lamang nang paraan si Ronalio para magkaayos ang dalawa.

Ngunit nalaman ng suspek na may iba na palang kinakasamang tomboy ang biktima na labis niyang ikinagalit.

Sinugod ang bahay ng bagong karelasyong tomboy ng biktima at naaktohan umano na naglalampungan ang dalawa.

Hindi nakapagtimpi ang suspek, binugbog ang biktima na humantong sa pananaksak.

Pinaghahanap pa ng mga awtoridad ang suspek.

Samantala sa Sorsogon, naglunsad ng hot pursuit operation ang mga awtoridad sa suspek sa pagpatay sa kanyang 17-anyos stepdaughter.

Kinilala ang biktimang si Angelica Lovedorial mula sa Bgy. Milagrosa Purok 1, bayan ng Castilla.

Ayon kay Insp. Christine Yorin, hepe ng Castilla Municipal Police Station, hindi pagkakaunawaan  ang dahilan ng insidente.

Sinasabing sinugod ng suspek na si Noel Lovedorial ang biktimang si Angelica habang naglalaba sa ilog.

Sandaling nag-usap ang dalawa hanggang mag-init ang ulo ng suspek.

Sa harap ng mga kapitbahay, sinabunutan muna ang dalagita, at nang tumingala ay ginilitan sa leeg na nagresulta sa agaran  kamatayan nito.

Ayon kay Yorin, ang suspek din ang nasa likod nang pagpatay sa kanyang sariling kapatid at sa ama ng biktima.

Patuloy ang paghahanap ng mga awtoridad sa salarin na nagbantang magpapakamatay makaraan ang insidente.