Jeepney bumaliktad 2 patay, 10 sugatan (Sa Zamboanga City)

ZAMBOANGA CITY – Dalawang pasahero ang namatay habang hindi bababa sa 10 ang sugatan makaraan bumangga sa poste ng koryente ang isang public utility jeepney (PUJ) hanggang bumaliktad sa highway ng Brgy. Pasobolong sa Zamboanga City kahapon.

Ayon kay Supt. Ariel Huesca, hepe ng Zamboanga City Public Safety Company (ZCPSC), papunta sa sentro ng lungsod ang naturang sasakyan dakong 8 a.m. kahapon nang mangyari ang aksidente.

Ayon sa imbestigasyon ng pulisya, umiwas sa dalawang nakasalubong na motorsiklo ang driver ng PUJ kaya nawalan ito ng direksyon sa pagtakbo na humantong sa aksidente.

Nakaligtas ang sakay ng isang motorsiklo ngunit nadamay ang isa pang motorsiklo na may dalawang sakay at kabilang sa mga nasugatan.

Idineklarang dead on arrival sa ospital si Romualdo Apolinario, 30, nadaganan sa ilalim PUJ, habang binawian ng buhay habang nilalapatan ng lunas ang 13-anyos estudyante na si Pauldrick Atilano.

Sugatan din ang 18-anyos kapatid ni Atilano na si Renmark.

Nakapiit na sa himpilan ng pulisya ang driver ng sasakyan na kinilalang si John Michael Fabian, 23, kabilang sa mga sugatan sa insidente.