54-anyos mister sinaksak ng 65-anyos misis (Tumangging magmasahe)

LA UNION – Sugatan ang isang lalaki makaraan saksakin ng kanyang misis nang tumanggi ang biktima na masahiin ang suspek kamakalawa ng gabi sa Brgy. San Agustin, lungsod ng San Fernando.

Kinilala ang biktimang si Edwin Obra, 54, habang ang salarin ay mismong misis niyang si Isabelita, 65-anyos.

Sa pagsisiyasat ng pulisya, bago matulog ang mag-asawa kamakalawa ng gabi, hiniling ni misis na masahiin siya ng kanyang asawa dahil napagod sa pagtatrabaho bilang manikurista.

Ngunit tumanggi si mister dahil matutulog na siya.

Sa pagpupumilit ni misis ay nagalit si mister kaya nasampal niya ang asawa.

Dahil parehong nakainom ang dalawa, gumanti si misis at sinaksak ang likod na bahagi ng ulo ni mister.

Nagpasaklolo ang biktima sa bahay ng kanyang kapatid na siya na ring nagdala sa kanya sa ospital.

Nabatid na dati na rin sinabuyan ng mainit na tubig at sinaksak ng ice pick ni misis ang kanyang asawa.

Sa kabila nito, tumangging magsampa ng kaso ang mister laban sa kanyang misis.