Zamboanga’s IDPS kinalimutan na ng gobyerno?

MABUTI na lamang at natawag ni Senator Miriam Defensor Santiago ang pansin ng pamahalaan kaugnay ng kalagayan ng mga internally displaced people (IDPs) sa Zamboanga City.

Higit dalawang taon na ang nakararaan nang ilagak sa tents (tolda) ang mga tao sa Zamboanga City na sinabing inatake ng mga tauhan ni Moro leader Nur Misuari nong Setyembre 2014.

Hanggang sa kasalukuyan ay sa tent pa rin naninirahan ang may 1,300 pamilya sa Zamboanga City.

What the fact!?

Kaya naman ipinupursige rin ni Senator Miriam na imbestigahan ang sinasabing ‘rehabilitasyon’ ng IDPs.

Kung hindi tayo nagkakamali, ang IDPs sa Zamboanga City ay nakatanggap pa ng tulong at donasyon mula sa United Nations at sa iba pang bansa.

Kaya naman maging ang US Embassy ay nagtataka kung bakit hanggang ngayon ay sa tent pa rin sila naninirahan.

Nang tanungin si DSWD Secretary Donkey ‘este Dinky Soliman, itinuro at sinisi niya ang National Housing Authority (NHA) ni Binay dahil sa napakabagal na pagtatayo umano ng mga bahay para sa IDPs.

Sinabi ng NHA, sa kalagitnan pa ng 2015 nila matatapos ang nasabing mga kabahayan.

At habang bumabagal o walang nangyayari sa rehabilitasyon ng IDPs lalo namang sumasama ang kondisyon kung saan sila inilagak ng gobyerno.

Marumi, walang tubig, hindi ligtas at araw-araw ay marami ang nagkakasakit.

Kung matatandaan, ang gobyerno at ang MILF ay lumagda sa isang peace agreement noong March ng nakaraang taon, pero ang pakiramdam umano ni Misurari ay nabalewala siya ng pamahalaan.

Sa ganang atin, sa sitwasyong ito, ang mga casualty ni Misuari ang tunay na biktima ng giyera sa Zamboanga.

Kaya dapat na bilis-bilisan ni Secretary Donkey ‘este Dinky ang rehabilitasyon ng mga tent people sa Zamboanga.