Paa ng 3-anyos totoy naipit sa escalator ng mall sa Isabela

CAUAYAN CITY, Isabela – Nabali ang limang daliri sa kanang paa ng isang 3-anyos batang lalaki makaraan maipit sa escalator ng isang malaking mall sa Santiago City.

Ang biktima itinago sa pangalang Dave, residente ng Bagabag, Nueva Vizcaya. Sa salaysay ng ina ng biktima, nagtungo sila sa Robinson’s Mall para maipasyal ang dalawang anak.

Galing sila sa game zone sa 3/F pero nang pababa na ay umiyak ang anak dahil ayaw pang umuwi. Sumakay sila sa escalator pero nang malapit na sila sa ibaba ay biglang umupo ang bata kaya naipit ang kanyang tsinelas kasama ang kanyang paa.

Sa panig ng mall, sinabi ng mga pinuno na sasagutin nila ang gastusin ng bata na nilalapatan ng lunas sa isang pribadong ospital sa Santiago City. (BETH JULIAN)