HATAW! D'yaryo ng Bayan hatawtabloid.com
LA UNION – Patay ang tatlo katao habang 21 ang sugatan sa pagtagilid ng isang pampasaherong jeep sa Brgy. Pias sa lungsod ng San Fernando, La Union dakong 8:15 a.m. kahapon.
Ayon sa ulat, galing ang naturang sasakyan na minamaneho ni Eugene Marquez, sa bulubunduking lugar ng Brgy. Baraoas patungo pababa sa sentro ng lungsod nang mangyari ang trahedya.
Sa paliwanag ng driver, hindi kumapit ang preno ng sasakyan kaya bumilis ang takbo nito palusong hanggang sa tumagilid sa palikong bahagi ng kalsada.
Dalawang pasahero ang naipit sa tumagilid na sasakyan na agad binawian ng buhay na sina Evangeline Arizobal ng Brgy. Pacpaco, at Loraine Mayo ng Bangbangolan, San Fernando City.
Habang nalagutan ng hininga sa pagamutan ang isa pang pasahero na si Helen Salcedo ng Brgy. Pacpaco dahil sa matinding pinsala sa kanyang katawan.
Patuloy na ginagamot sa iba’t ibang pagamutan sa lungsod ang iba pang sugatang mga pasahero.
(BETH JULIAN)
