Secretary ng Leyte mayor, binoga sa ulo

TACLOBAN CITY – Kritikal ang kalagayan ng secretary ng mayor sa bayan ng Merida, Leyte makaraan barilin sa ulo nang malapitan ng hindi nakilalang suspek habang nagpapahinga sa kayang pwesto sa public market matapos maki-pag-inoman sa kanyang mga barkada kahapon ng madaling araw.

Kinilala ni PNP chief of police Eduard Moto Satorre ang biktimang si Remegio Mopon Jr., 35, residente ng Poblacion sa bayan ng Merida, bagong appointed secretary ni Mayor Antonio Martinez.

Sinabi ni Satorre, ang biktima ay nakipag-inoman hanggang madaling araw sa kanilang stall sa public market ng nasabing bayan sa kanyang mga kaibigan na mga beki.

Ayon sa mga nakasaksi, dumaan ang hindi nakilalang suspek sa mga nag-iinoman at biglang pinaputukan sa ulo ang biktima.

Makaraan ang pamamaril ay naglakad lamang palayo ang suspek na parang wala lang nangyari.

Agaw-buhay ngayon ang biktima sa isang pribadong pagamutan sa Ormoc City.

Patuloy na iniimbestigahan ng mga awtoridad ang krimen kung may kinalaman ito sa kanyang trabaho.